KASSIM “RHYTHM” KALUONA WA SEGERE MATATA


Marehemu Kasimu Karuona: picha kwa Hisani ya mdau Issa michuzi issamichuzi.blogspot.com

 

 KASSIM “RHYTHM” KALUONA WA SEGERE  MATATA, NYOTA YA MAGHARIBI ILIYOZIMIKA GHAFLA

  

Aliwashangaza wengi kwa Gita lake la Rythm lililo ongoza baadhi ya nyimbo kama dada Helena, chakula kwa jirani na nyinginezo

Watu wengi Tabora walimfahamu kwa jina la Kassim rhythm hata wasisumbuke kujua jina la baba yake

Tabora, Dar na Kigoma vyakumbwa na wingu zito la simanzi.. kifo chake chatonesha donda la marehemu Hanzuruni, Wema Abdalla, Msafiri Haroub, Issa Ramadhani na Halfani Juma

________________________________________________________________________

 Kifo mara zote huja kwa kushitukiza, ndivyo zilivyokuja taarifa za kifo cha marehemu mwamamuziki mkongwe Kassim Hassani Kaluona maarufu kama Kassim Rythm aliyefariki dunia siku ya Jumatano ya novemba 22, 2006 Jijini. Marehemu alikuwa ni mwanamuziki wa Tabora Srar  zamani Tabora Jazz au Segere matata iliyokuwa na makazi yake kule Tabora Lumumba kwenye makutano ya mitaa ya Rufita na mtaa wa Fundi. Kwa sasa Bendi hiyo inaitwa Tabora Star.  

Taarifa za kustua za msiba

 Ingawa taarifa hizo zilikuwa zimeenea Jijini tangu siku iliyofuatia ya Alhamis majira ya mchana wengi walizipata taarifa za kifo cha Kassim rythm katika vipindi vya michezo na kwenye taarifa za habari za televisheni.Ilishitua. Nilimuangalia Mzee Shem Ibrahim Karenga alipokuwa akitoa taarifa za msiba  kwenye Luninga, alikuwa amekosa ile nuru yake. Hilo lilitegemewa kama ambavyo imewatokea watu waliokuwa wakimjua marehemu Kassim walipopata taarifa za kifo chake. Kwa Mzee Shem Karenga hili ni pigo kubwa na ni zaidi, alikuwa na marehemu katika kazi na walikuwa maswahiba wakubwa kwa zaidi ya miaka 30. Umri wa mtu mwenye familia.

 Wasifu

  Sikumfahamu sana marehemu zaidi ya kuzifahamu kazi zake.  Siwezi kujinadi  kuwa nilifahamu. Tulimfahamu marehemu Kassim kwa kumuona kama ni mwanamuziki mtanashati, au mfua uji kwa lugha za enzi hizo. Jukwaani hata nje ya jukwaa hakuwa muongeaji kama marehemu Msafiri haroob aliyekuwa  Hakuwa mzungumzaji sana. Zamani wakati nasoma Tabora enzi zile za miaka ya sabini tulikuwa tunakwenda kuangalia  mazoezi ya Segere Matata. Wakati ule watoto au  wanafunzi hatukuruhusiwa kuingia Dansini hivyo mara nyingi kama kulikuwa na  dansi tuliishia nje . tuliusikiliza muziki kwa nje na mara nyingi tulikaa katika baraza ya mama mmoja maarufu sana Tabora mama Adeni. Mama yake (Ismail Aden Rage huyu wa Moro star). Mama huyu alikuwa na Hoteli iliyoitwa Tanzania Hotel iliyokuwa mtaa wa Rufita. kwa wale wanaojua Tabora na hulka zake, katika hoteli ile kulikuwa na Baraza kubwa sana ya kahawa. Tanzania hoteli ilikuwa pua na mdomo kutoka  Lumumba uliokuwa ukumbi wa Tabora Jazz.

 Hamu ya kwanza enzi hizo ilikuwa ni kuwajua wanamuziki. Hao ndio walikuwa nyota wetu stars. Vijana wa sasa nyota wao ni kina Eminem. Basi hapo ndipo nilimfahamu marehemu Kaka Kassimu na tangu enzi zile mpaka wakati nilipokuwa namuona alikuwa unaweza kusema hazeeki. Baada ya miaka 20 alibaki kuwa na umbo lile lile na sisi wengine tutaanza kuonekana kama tunalingana naye umri.

 Kassimu alibaki marehemu Issa Ramadhani na Mzee Kitambi walipoenda Msondo na Msafiri alipoenda Paselepa

 Nakumbuka mwaka 1978  Bendi ya Msondo walikuja Tabora walipoondoka baada ya kumaliza ziara yao  baadaye zikaja habari kuwa Marehemu Issa Ramadhani (Baba Isaya) na Mzee Hamisi Kitambi walikuwa wamekuja Dar na kwamba wamejiunga na Msondo. Kuna watu walilia kama kafa mtu kwa kuhama kwa wanamuziki hao.wakati ule hakikuwa kitu cha kawaida. Nakumbuka kuna rafiki yangu mmoja Mohammedi Hassan Kaombwe aliuliza kwani na Kassimu naye kaondoka! Alipojibiwa kuwa Kassimu yupo hajaondoka watu wote wakatuliza mioyo. Huyo ndio marehemu kassimu. Msondo Ngoma katika miaka ya 1980 ilinuniwa na wakazi wengi wa Tabora kwa kuwachukua wanamuziki Issa na Mzee Kitambi.

 Kazi zake

Hapa ndipo niliposema kuwa nimezifahamu na kuzisikiliza sana kazi zake hii ni kwa sababu niliipenda sana Segere matata, segua segua. Niliupenda pia muziki wake wa uliokuwa na mahadhi ya kimanyema na kisonge. Mahadhi ambayo hata marehemu Marijan alikuwa anapiga.

 Alishiriki kupiga gita la rythms katika nyimbo karibu zote huku Shemu  Karenga akipiga gita la solo na kuimba pamoja na kina marehemu Msafiri Habob aliyehamia Paselepa bbadaye miaka 1980. Marehemu Kassimu alipiga gita la rythm jinsi anavyotaka. Kwa wale wataobahatika kusikiliza wimbo wa dada helena uliopigwa na Tabora Jazz wanaweza kuelewa ninachozungumzia, gita lake ndio lilikuwa kiongozi katika wimbo huo. Nyimbo nyingine ni pamoja na Halima, Kilimo, Chakula kwa Jirani, Alhamdulilah, kazi ya kulima ndio maisha ya watu wote, samba yasika, dada Remi, dada Asha na 1 na na 2, dada zena, dada Helena jitulize,  Ruth, belaombwe, hasira hasara,  uliopigwa kwa staili ya kavasha na nyingi nyinginezo nyingi ukiwemo merina nihurumie. Zainab,   akasema kuwa

 

Kiigizo  kwa wanamuziki chipukizi

Moja kati ya sifa za wanamuziki wa zamani aliwemo marehemu Kassimu ni kuwa kiigizo. Wakati ule Tabora na hata mikoa ya jirani kama Kigoma , Rukwa na Shinyanga kila kijana alipenda awe kama Kassim, Shemu, Athuman Tembo au Salum Luzila.

 Wapo vijana wengi waliofuatia ambao muziki wa kaka zao kina Kasimu uliwavutia. Orodha ni ndefu, kina Juma Banduki aliyekuwa mpiga kinanda wa Mkote Ngoma na hatimaye Sikinde, kina  Madaraka Moris (kiwembe), Kibonge, kina Fransis aliyeanza kupiga gita akiwa na sare za shule ya  Kazima sekondari lakini akaweza kumudu masomo na muziki, yupo  kaka yangu Rehani Juma (Profesa wa munisa ndesa) na wengineo wengi ambao walivutiwa na kazi za wanamuziki hawa wakongwe kina kasimu.

 Buriani Kassim

Kassim umetangulia mbele ya haki ambako sisi sote tunakuja huko. Kwa kiasi nilichofahamu kazi yako isingekuwa haki kuacha kukuandikia taazia hii ewe kassim rythm. Kuna siku nilishawahi kumuambia komredi wangu mmoja anayeandikia Gazeti moja maarufu la wiki hapa nchini kuwa itafika siku watu watauliza hivi Shaaban Robert, Hukwe Zawose, Athuman Khalfan, Mathias Mnyapala, Abbas Mzee, Juma Kilaza, Salim Abdalla,  Patrick Balisidya au Marijan Rajab na Saleh Ramadhan Mwinamila ndio kina nani?

 Kassim kama mashujaa wenzako mmelifanyia kazi kubwa Taifa hili kupitia sanaa na ubunifu wenu, mkaitangaza nchi hii (njii hii)  ndani na nje ya mipaka yake. Mmefanya kazi kubwa lakini kama wenzako mmeondoka kimya kimya. Ndivyo walivyo watu wenye matendo makuu. Tuliwakumbuka kwa siku mbili tatu baadaye tukashika hamsini zetu. Tunayajua zaidi mashairi ya shake Spear ya mwaka 1600 kuliko mashairi ya Saadan Kandoro. Haya ni makosa makubwa. Tunapaswa tuwakumbuke mashujaa wetu ninyi  kama kielelezo cha shukurani. Wakati wengine waliopo Marekani sasa hivi wanatafuta asili zao root.  Sisi angalau tunaijua asili yetu basi tuanzie hapa. Buriani kassim, Msiba wako nimeutumia kama jukwaa la kuelezea kile kilichiokuwa kinaniganda kwa siku nyingi. Nisamehe kwa hilo. Tunakuombea duaa wakati huu tunauanza mwaka 2009.Buriani.. 

 picha kwa Hisani ya mdau Issa michuzi issamichuzi.blogspot.com

 Marehemu Kassim rythm wa Segere matata

 

3 Responses to “KASSIM “RHYTHM” KALUONA WA SEGERE MATATA”

  1. Anonymous Says:

    Hi
    I am so proud to be mnyamwezi, and I will still be, mtu kwao .Watu wengine wapo proud kuwa wazaramu na kusahau Tabora kwani wanaona ni aibu kuwa wamezaliwa Tabora na wakisema ni kijijini. Katika watu maharufu Tabora naona umesahau ukoo wa Hamisi waziri Mwenda
    thanks

  2. Shaib Says:

    Ni kumbukumbu nzuri sana mimi na wenzangu tulimjua vile vile kama Kassim Bakoloketa, lwa sifa za mpigaji rithim wa kizaire wa enzi hizo. vile vile yule aliekuwa Bossi wa Tabora Jazz ambae pia alikua kocha wa timu ya vita nimemsahau jina,
    Shaib

    • uyui Says:

      Huyo Mzee alikuwa anaitwa Mzee Mlekwa

      Asante Shaib

      Uyui


Leave a Reply (Please be decent) Acha ujumbe wako hapa (kuwa mstaarabu)

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Uyui

A website about Uyui, Tabora heritages and the Wanyamwezi

Shahermohd's Blog

Just another WordPress.com site

WordPress.com

WordPress.com is the best place for your personal blog or business site.

%d bloggers like this: